Qarsoq Høegh-Dam ima Facebook-ikkut nalunaaruteqarpoq:
“Politikkip anoraa malillugu tunuarnissamut aalajangiineq.
Politikkerneq inummut ataatsimut tunngaveqartussaanngilaq, politikki inuiaqatigiinnut pitsaanerpaamik tunngaviusumik anguniakkamut aallaaveqartuaannassaaq.
Pisoq uannut ilannullu tukattumut saatsitsilersartoq maanna torersumut saatsinniarpara.
Ulloq Inatsisartunut ivertinneqarneq kalaallisoorluni persuarsiorfittut atorneqartussaavoq. Taamaammat Inatsisartunut qinikkat amerlanerussutillit ilimanaatilimmik aalajangiinissaat sioqqutsinniarlugu Inatsisartuniit tunuareerniarlunga aalajangerpunga.
Maanna uannut suliaq ammasumik eqqartugaangaatsiareernera ilutigalugu, Inatsisartunut qinikkat amerlanerussuteqarpaluttussat malillugit aalajangiinissaraluat torersumik sioqqutsillugu iliuuseqarfigereerniarpara.
Suliaq politikkilu torersumik maanna ingerlattariaqalerpagut.
Naak Inatsisartuni aalajangiinermut pisimasoq tunngavigineqartussaq siornatigut oqareernittuut inuuniarninnut akornutaanngikkaluartoq, naak atorfininnissamut akornutaanngikkaluartoq akornutaanikuungitsorlu, naak uannut “straffeattest” pinerlussimanermut allaqqasoqanngikkaluartoq, Inatsisartunut qinikkat amerlanerussutillit kikkut Inatsisartutut isernissaannut aalajangiisussaallutik naalagaapput.
Tamannalu demokrati aqqani amerlanerussutillit oqartussaasarnerat Isumaqataanngikkaluaraanniluunniit ataqqeqqissaarneqartuaannassaaq. Taamaattussaavoq, tamannalu ataqqilluinnarpara.
Tamanna Siumup siuttuinut Inatsisartullu siulittaasoqarfiannut anngutereerpara.
Tunngaviusumimmi anguniagaq suli anguniarneqartuassaaq.
Asuliinnarmi Siumut politikkikkut partiitut tunuliaqutigalugu sassanngilanga. Atia kisimi pillugu tunuliaqutsiutinngilara, inuttai pillugit illersunngilara akerlerinianngilaralu, ilaquttat pillugit tunuliaqutiginngilara, arsaattut assigalugit klub-eriniaannarlugu sassarfiginngilara.
Inuttut namminerpiaq tunngaviusumik isumaqatigigakku sassarfiginikuuara. Neriuppungalu politikkivini anguniartuassagaa.
Politik inummut ataatsimut aallaaviunngisaannarluni, tunngaviusumik anguniakkat aallaaviusuaannarlutik, inuiaqatigiit sullitassat salliuttuarneqartuarlik.
Naggataatigullu politikkimut (sumulluunniit) sassaqqarninni ilimaginngisaavinnik inuit taamak amerlatigisut qinersimammannga minnerunngitsumik qujangaatsiarusuppunga, naak TV-kkut qineqqusaartinneqanngikkaluarlunga, naak illoqarfigisara qimallugu qineqqusaarnikuunngikkaluartunga.
Suli allanngueqatigerusuppassi.
Politikkili ullormiit ullormut Nuup silaatulli allanngorartigisinnaasarpoq. Tamannalu tarnikkut piareersimaffigigaanni inuttut ingerlariaqqittoqartuaannassaaq.
Taamatulli oqareerlunga, arlaleriarlunga oqareernittuut maanna aamma oqaqqissaanga: Nipangernavianngilanga.
Ajunngikkisi, qinikkallu pilluaritsi.
(neriulluarlungalu arlaat kalaallisoornermini anisitaariasaassanngitsoq).
– Qarsoq Høegh-Dam”
