Naalakkersuisut ullumi 10. januar 2018 kiisami allariaqqinnissamut isummerput, imatullu tusagassiorfinnut nalunaaruteqarlutik:
“Naalakkersuisut januaarip qulinganni aalajangerput, Mala Høy Kúko, Siumut, Tunngaviusumik Inatsisissaq pillugu Isumalioqatigiissitamiit tunuassasoq. Isumalioqatigiissitami Mala Høy Kúkop ilaasortaaffia inuttalerneqanngikkallassaaq. Taamannak aalajangernermut Atassutip Inatsisartuni ilaasortaatitaarunneranik tunngaveqarpoq.
Taamaalillunilu Isumalioqatigiissitami ilaasortanut inissat arfiniliinnaagallassapput.
Naalakkersuisut aamma aalajangerpaat, Ane Hansenip, Inuit Ataqatigiit, Inatsisartuni sulinngiffeqarnera pissutaalluni Isumalioqatigiissitamiit ilaasortaajunnaartinneqassasoq. Naalakkersuisullu Inuit Ataqatigiinnut innersuussutigaat isumalioqatigiissitamut ilaasortaatitassaminnik nutaamik innersuussuteqaqqullugit.
Kommuneqarfiit neqeroorfigineqassapput Tungaviusumik Inatsisissaq pillugu Isumalioqatigiissitap sulineranut suleqataasinnaassasut
Isumalioqatigiissitap suleriusissaanut najoqqutassiami allassimavoq Naalakkersuisut inunnik marluk sisamallu akornanniittunik Isumalioqatigiissitamut aalajangeeqataanatik peqataasartussanik toqqaasinnaatitaassasut. Naalakkersuisullu aalajangerpaat kommuneqarfiit neqeroorfigineqassasut periarfissinneqassasullu borgmesteri Isumalioqatigiissitami aalajangeeqataanani peqataasartussatut toqqarneqarsinnaasoq.
”Tunngaviusumik Inatsisissaq pillugu Isumalioqatigiissitap katitigaanerata aaqqiivigineqarnera iluarisimaarpara, tamanna suliakkiissutinut najoqqutassiamut taamalu inatsisartut Naalakkersuisunut Isumalioqatigiissitap pilersinneqarneranut tunngaviliineranut naapertuuppoq taamaasilluni isumalioqatigiissitami sulineq nangittumik ingerlaqqissinnaalissaaq, innersuussutigalugu Isumalioqatigiissitami siulittaasup tulliatalu tusagassiutinut nalunaarutaanni “suleriaqqissinnaanissamut piareersimanertik” oqariartuutigimmassuk. Taamaammat qilanaarpunga Isumalioqatigiissitap sulinera nangittumik malinnaaviginissaanut sulilluarnissaanillu kissaallugit”, Suka K. Frederiksen oqarpoq.”
Aajuna Tusagassiorfinnut nalunaarut naalakkersuisut nittartagaanni atuarneqarsinnaasoq:
Kalaallisut: Tunngaviusumik Inatsisissaq pillugu Isumalioqatigiissitap katitigaanera Naalakkersuisut nutarterpaat
Qallunaatut: Naalakkersuisut opdaterer sammensætningen af Forfatningskommissionen
