Atassut: “Namminersuleriartuaarneq isumannaatsumik piviusorsiortumillu ingerlasariaqarpoq…”

Nunarsuarmioqatigiinni innuttaasut ataatsimoornerujartuinnarneranni naalagaaffiit assigiinngitsut imminnut qanilliartorlutik ineriartorfianni aammalu allaat ataatsimut kattunnissaminnut aqqutissiulerfianni ATASSUT isumaqarpoq Kalaallit Nunaanni partiinit ataasiakkaanit namminersulernissamik kissaatigineqartut nunarsuarmioqatitta sinnerinut tulluartuunngitsut.

Soorunami inuiaqatigiiuvugut, aammalu soorunami kulturerput immikkuullarissuunerpullu illersussallugit, kisiannili Danmarkimit nunarsuarmioqatinillu avissaarutta naleqassuserput annerulissasoq uppersissagutsigu tamanna nunarsuarmioqatitsinnut attaveqarnitsinni akisoorujussuanngorsinnaavoq .

Kalaallit Nunaata piffissap sivisuallaanngitsup ingerlanerani naalagaaffittut namminersortutut anguniagai piviusorsiortuunngitsut piviusunngortinneqassappata tamanna inuiaqatigiit ilarpassuisa inuuniarnermut tunngaviaannut akisoorujussuussaaq. Tamannaannaanngilarli, aammattaaq aningaasaqarnermik aqutsinitsinnut pitsaasumut piviusorsiortumullu pilersinnialikkatsinnut aseruutaassalluni.

Taamaattumik ATASSUT-ip naalagaaffeqatigiinnerup iluani nammineersinnaaneq isumaqatigaa, imaanngitsoq ATASSUT-ip naalagaaffeqatigiinneq aammalu naalagaaffiup ataatsimoortumik tapissutai sinnassaatitut atorniarmagit, taamaanngilluinnarpoq.

Namminersuleriartuaarneq isumannaatsumik piviusorsiortumillu ingerlasariaqarpoq, taamaalilluta qulakkiissagatsigu innuttaasut tamarmik peqataanissaat. Tassami piffissaq ingerlassaaq inuiaqatigiittut imminnut makitinnissaata aammalu nunatta aningaasaqarnikkut imminut napatilernissaata, taamalu nunatut namminersortunngornissaat, tungaanut.

Innuttaasut naalagaaffittut namminersortutut anguniakkanut piviusorsiortuunngitsunut piginnaatitsissappata, taava innuttaasut aammattaaq inuuniarnermi atukkamik pitsaannginnerulernissaat piareersimaffigisariaqarpaat. Kiffartuussineq pitsaannginnerulissaaq, tamatumanilu kikkut eqqugaassappat? Inuiaqatigiinni sanngiitsortaasut akisoorujussuarmik akiliisussanngussapput.”