D: “Taamaattumik sammisariaqarparput qanoq imminut napatittumik aningaasaqalissanerluta, tamanna namminersornissamut toqqammaviummat.”

“NAMMINERSORNEQ

Kikkut tamarmik paasisimalersimatsiaqqavaat kissaatigilerutsigut ingerlaannaq namminersulersinnaalluta. Kikkulli tamarmik aamma nalunngilaat namminersornerup kingunerissagaa Qallunaat Nunaanniit aningaasanik tapiissutisisarnerup uninnera. Taamaattumik sammisariaqarparput qanoq imminut napatittumik aningaasaqalissanerluta, tamanna namminersornissamut toqqammaviummat.Imminut napatittumik aningaasaqarneq angujumallugu inuiaqatigiinnik nutaaliaasunik pilersitsisariaqarpugut sinneqartoorutinik pilersitsiffiusinnaasunik. Tamassuma piumasaraa ilaatigut najugaqariusitta allanngortinnissaanut piareersimanissarput, tassani nunaqarfiit amerlavallaarnerat aningaasaqarnitsinnik artorsartitsisuulluni.

Ullumerninngaanniit aningaasarsiornerujumalluta toqqammavivinnik pilersitsisariaqarpugut avammut tunisassiornerput nalitunerulersissinnaajumallugu. Nunat tamalaat akornanni niueqatigiinnermi sunniuteqarluartumik peqataanissap piumasaqaatigivaa sunniuteqarluartumik unamillersinnaassuseqarluartumillu inuussutissarsiortoqarnissaq. Inuussutissarsiortunut sinaakkutit pitsaanerpaat pilersinneqassapput ilinniartitaanermut, ilisimatuutut misissuinermut nutaaliornermullu aningaasaliissutit qaffannerisigut – malugalugu ilinniarfiit pitsaasut nunat tamalaat akornannitulli pitsaassusillit. Naammassisaqarluarsinnaaneq, naammassisaqarsinnaanermut atortut pitsaanerit kiisalu qaffasittumik ilinniagalinnik sulisartoqarneq annertusiartuinnartumik suliffeqarfiit unammillersinnaassusaannut sunniuteqaleriartussapput taamaattumillu avammut tunisassiorsinnaanermut aammalu Kalaallit Nunaanni suliffissaqartitsinermut. Tamanna aqqutissatuaavoq imminut napatittumik aningaasaqalernissamut taamaattumillu aqqutissatuaalluni Kalaallit Nunaata namminersornissaanut takorluuinermik piviusunngortitsinissamik.”

Demokraatit partiitut anguniagai tamakkiisut uani atuarneqarsinnaapput:
http://demokraatit.gl/kl-gl/politikki/anguniakkat.aspx