“Suna pillugu ikiorneqaannarluta inuussaagut? Uagut nammineq sapinngilagut!” Hans Lynge
Nunarput allanngortinneqartariaqanngitsumik namminiilivikkiartorpoq. Suliniarnermi tamatumani tusagassiinermi amerlanerussuteqartut illersorneqarnissaat pisariaqarpoq, ullumikkummi tusagassiorfitsigut oqimaaqatigiissumik ingerlatsisoqarnera takussutissaqanngimmat.
Taamaammat nittartagaq una – isummat, ilisimasat paasissutissallu namminiilivikkiartuaarnermut iluatinnaateqartut ataatsimoorussamik katersuuffeqarnissaannik siunertaqarluni pilersitaavoq.
Namminiilivinnissap sulissutiginera ataatsimoorfiusariaqarpoq, avissaartuullunimi inuiaqatigiit suulluunniit ingerlanneqarsinnaannginnerat qangaaniilli ilisimaneqarpoq.
Taammaammat, partiilersuunnagu, http://www.paartoq.gl tassaajumavoq:
- Tamat katersuuffigisinnaasaat, tamat atorsinnaasaannik imalik,
- Ilisimasanik katersuiffik,
- Paasisanik siammarteqatigiiffik,
- Namminiilivinnissamullu suliniarnermi isummanik iluatinnartunik avitseqatigiiffik.
Malugalugu!: Takorloorneqanngilaq illersuisut isumaqataanngitsullu ‘assortuuttarfissaattut’ nittartagaq manna atorneqassasoq.
Taakku tusagassiorfinni allani ingerlanneqartareerput.
Soorunami isummat assigiinngisitaartut saqqummiunneqarsinnaapput, tamannali tunngavilersorluakkamik aatsaat ingerlanneqarpat ilanngunneqartarumaarput.
Saqqummiussat oqaatsit atorumasat atorlugit saqqummiunneqartassapput, piffissarujussuarmi nutserinermut atorneqarnissaa takorluunngilarput.
